Oceans North Kalaallit Nunaanni siulersuisut Jenseeraq Poulsen pisortatut atorfinitsippaat. Jenseeraq Poulsen aqutsisutut aaqqissuussinermik suliniutinullu tunngatillugu misilittagaqarluarpoq.

Apriilip aallaqqaataani 2023-imi Jenseeraq Poulsen suliffittaamini aallartippoq. Pisortani namminersortunilu suliffeqarfinni suliniutinut ingerlatsinermut misilittagaqarluarmat Jenseeraq Poulsen siulersuisut toqqarpaat, aamma politikkikkut allaffissornermut aaqqissuussat ilisimasaqarfigilluarlugillu peqatigiiffinnik ineriartortitsineq pilersaarusiornerlu ilisimasaqarfigilluarmagit. Oceans North Kalaallit Nunaannik (ONKN) piujuartitsinermik aningaasaliiffitut NGO-tullu ineriartornissaa Jenseeqqap pisortatut nutaatut suleqataaffigissavaa.

Jens Immanuelsen, ONKN-imi siulersuisut siulittaasuat oqaaseqarpoq:

• “Inuiaqatigiit, suliffeqarfiit allallu suleqatissat isumaannik tusarnaarusuttumik, pinngortitami piujuartitsisumik atuinissaq pingaartillugu peqatigiiffimmik ineriartortitsisinnaasumik ONKN pisortartaarnera qularutiginngilara.”

Louie Porta, Oceans North Canadami pisortaallunilu ONKN-imi siulersuisunut ilaasortaq oqaaseqarpoq:

• “Suliassat suleqatigiilluni naammassillugit pitsaanerusarpoq, Kalaallit Nunaanni NGO-mik, pinngortitamik piujuartitsisumik imarmilu peqqissumik avatangiiseqarnissamik pingaartitsisumik, peqatigiiffittut pilersitsiniarluta kissaatitsinni Jenseeqqamik suleqateqarnissaq Canadamiit qilanaaraarput.”

Jenseeraq Poulsen, ONKN-imi pisortaq oqaaseqarpoq:

• “NGO-mik suliaqarneq uannut nutaajunngilaq. Politikkikkut peqatigiiffimmit ukiorpaalunni tunniusimallunga sulisimanera ONKN-p suliaanik siammarsaanissannut piukkunnaatigaara. Issittumi pinngortitaq qajannarpoq, sulilu ukiorpassuit inuuffigisinnaanissaata qulakkeernissaa pisussaaffigaarput. ONKN aqqutigalugu piujuartitsinissap qulakkeernissaa qilanaaringaarpara. Taamammat piujuartitsisumik ineriartorneq, atuineq illersuinerlu ilanngullugit, inuiaqatigiit pisariartitaannut iluaqutaasumik kinguaatta periarfissaannut aseruinngitsumik ingerlasinnaavoq.