Anguniagarput suliassarpullu
“Nunatsinni innuttaasut peqatigalugit imartat tassanilu pisuussutit uumassusillit illersorneqarnissaannut piujuartitsinermillu toqqammaveqartumik aqunneqarnissaat suleqataavugut”
ANGUNIAGARPUT
Oceans North Kalaallit Nunaanni siunertaraarput suliniaqatigiiffiussalluta nukittooq, piujuartitsinermik toqqammaveqartumik isumaliortaatsinik aqutsinernillu ukkatarinnittoq – Imartatsinni aamma aalisarnermi.
Suliassarput
Oceans North Kalaallit Nunaanni anguniagaraarput imartat sinerissamilu sumiiffiit pillugit ilisimasanik piorsaanissaq ingerlatitseqqiisarnissarlu, tamannalu sumiiffinni inoqarfinnik suleqateqarluni pissaaq.
Inoqarfiit ukkatarinerisigut sumiiffinni isiginnittaatsinik allanngutsaaliuinermillu pingaarnersiuinernik Oceans North Kalaallit Nunaat kivitseqataassaaq.
Naleqartitatut toqqammavigut
Oceans North Kalaallit Nunaata suliniutigaa qulakkeeqataaffigiumallugulu kinguaariit tulliisa pisuussutinik uumassusilinnik Issittumiittunik atuijuaannarsinnaanissaat, taamalu kinguaariinni arlalippassuarni immikkuullarissumik inooriaaseqarnermik nangitsinissaat anguniarlugu.
Piujuaannartitsineq pillugu Naalagaaffiit Peqatigiit anguniagaat Oceans North Kalaallit Nunaata taperserpai, pingaartumik anguniagaq nr. 14: Imartani uumassusillit. Kalaallit Nunaata, Issittumi nunat allat aammalumi nunarsuatsinni nunat allat assigalugit, imartat innarlerneqanngitsut pinngitsoorsinnaanngilluinnarpai, tamannalu naqissuserneqarpoq Kalaallit Nunaata avammut niuerutigisaasa 90 procentii tassaammata aalisakkanik nioqqutissiat.
Oceans North Kalaallit Nunaat taamaaliorpoq suliniutit sumiiffinni ataasiakkaani, nuna tamakkerlugu nunanillu allaneersunit peqataaffigineqartut akuuffiginerisigut, suliniutit Kalaallit Nunaannut avataaniittunullu avatangiisit eqqarsaatigalugit iluaqutaasussat eqqarsaatigalugit. Suliniutit pingaartumik piujuartitsinermik toqqammaveqartumik imaqartut, tassunga ilaallutik uumassusilinnik atuinermik (aqutsinermik) aammalu imartat innarlerneqannginnissaannik imaqartut, suliniutigineqarneranni Oceans North Kalaallit Nunaata innuttaasunik oqaloqateqarneq aqqutigalugu suleqatigiissutigisassanik ukkatarinnippoq.
Uumassusilinnik atuinermut atatillugu suliniaqatigiiffiviup ataqqivaa siunnersuineq aalajangiinerillu ilisimatuussutsikkut misissuinernik toqqammaveqartoq.
NAJOQQUTASSAT
Oceans North Kalaallit Nunaat avatangiisinut tunngasunut aningaasaateqarfiuvoq, naalakkersuinikkut pituttorsimanngitsoq, imartat illersorneqarnissaannik kiisalu imaani uumassusillit piujuartitsinermik toqqammaveqartumik atorneqarnissaannik suliniuteqartoq, suleqatigalugit Nunatsinni suliniaqatigiiffiit, inoqarfiit aamma ilisimatusartartut.
Aningaasaateqarfiup siunertaraa imartani avatangiisit sinerissamilu sumiiffiit pillugit ilisimasanik annertusaanissaq ingerlatitseqqiinissarlu Issittumi nunap inoqqaavi suleqatigalugit. Aamma tapersersorpaa naggueqatigiit Inuit pisinnaatitaaffiisa ineriartortittuarnissaat kiisalu tapersersorlugit suliniutit ilinniartitaanermut, piujuartitsinermut kulturimullu tunngassuteqartut.
Aningaasaateqarfik pilersinneqarpoq 14. september 2021, Nuummilu allaffeqarluni.
