Sverigemit, Ålandimit, Danmarkimit, Norgemit, Islandimit, Savalimmiunit aamma Kalaallit Nunaannit avatangiisitigut suliniaqatigiiffiit ullumikkut Uumasut Assigiinngisitaarneri pillugit Isumaqatigiissusiortunut (CBD) ataatsimoortumik ernumassuteqarnermik allagaqarput, tassani imaani isumalluutit uumassusillit attanneqarsinnaasumik atorneqarnissaannut nukittunerusumik suliniuteqarnissamut kaammattuuteqarlutik.
Suliniaqatigiiffiit uumassusilinnut tunngatillugu attanneqarsinnaanngitsumik aalisakkanik pisassiissutit sumiiffinni arlalinni suli ingerlanerat ernumassutigalugu oqariartuutigaat, aamma immap naqqani qalorsuit atorlugit kilisanneq suli imaani sumiiffinni illersorneqartuni ingerlanneqartut, tassunga ilanngullugu Den Europæiske Unionimi Natura-2000-sumiiffiit iluini.
Suliniaqatigiiffiit malillugit CBD-p aamma nunarsuaq tamakkerlugu uumasoqatigiit assigiinngiiaarnerat pillugu Kunming-Montreal-isumaqatigiissutip ataani pisussaaffinnik naammassinninnissaq pillugu annertuumik apeqqusiisoqarpoq.
”Imaani uumasoqatigiiaat peqqissumik ataqatigiinnerat siunissami aalisarnermut tunngaviuvoq. Attanneqarsinnaasumik aalisarneq aamma uumassusillit assigiinngiiaarnerannik illersuineq anguniakkanit killormut isigineqartariaqanngillat. Akerlianilli imaani uumasut ataqatigiinneri peqqissut siunissami ungasissumi aalisarluarnerunissamut pingaaruteqarput.”
Suliniaqatigiiffiit maluginiarpaat, Den Europæiske Unionip nammineerluni CBD-allaffeqarfimmut nalunaarutini aamma ataatsimoortumik aalisarnermut politikkit naliliiffigineqaqqammerneri suli attanneqarsinnaasumik aalisarnerup anguneqarnissaanut atatillugu annertuumik unammilligassaqartitsisut.
Taammattumik suliniaqatigiiffiit ukiormanna kingusinnerusukkut Armeniami COP17 sioqqullugu CBD-mut kaammattuipput ukua eqqummaariffigeqqullugit:
- Aalisarnermut atatillugu iumassuseqatigiit ataqatigiinnerannut pisussaaffinnik naammassinninneq atuutsitsinerlu
- Imaani uumassusilinnik isumalluutinik attanneqarsinnaasumik atuineq
- Imaani illersorneqartuni aalisariaatsit aserorterisut atorneqaannarput
- Imaani uumasuuffinnik qulaajaanerup illersuinerup pitsanngorsarneqarnissaa
Suliniaqatigiit erseqqissarpaat, nunarsuaq tamakkerlugu uumassuseqatigiit assigiinngiiaartuunissaannut anguniakkamik angusiniarnermi europami aamma nuna tamakkerlugu naammassinnissamut suliniutit nukittunerusut pisariaqartinneqarput.
Ataatsimut allagaqaat CBD-mi allatsimut aamma Europa-kommissionimut, tunniullugu, Europa-Parlamentimi avatangiisit, inuiaat peqqissusaat aamma inuussutissat isumannaatsuunissaat pillugit ataatsimiititamut (ENVI) kiisalu nunani avannarlerni aalajangiisartunut attuumassuteqartunut nassiunneqarpoq.
Atsiortut:
Naturskyddsföreningen (Sverige)
Ålands Natur & Miljö (Åland)
Danmarks Naturfredningsforening (Danmark)
Naturvernforbundet (Norge)
Landvernd (Island)
Føroya Náttúru- og Umhvørvisfelag (Færøerne)
Oceans North Kalaallit Nunaat (Kalaallit Nunaat)
Paasissutissanik amerlanerusunik pissarsiniarnermi:
Birgith Lassen
Generalsekretæri
Savalimmiuni avatangiisit aamma silap pissusaa pillugu suliniaqatigiiffik, Føroya Náttúru- og Umhvørvisfelag (FNU)
