ONKN-ip aallarniutaasumik tusarniaalluni oqallittitsinissaa Nuummi pissaaq. Sammineqassalluni nungusaataangitsumik aalisarneq, sinerissap qanittuani qaleralinniarneq tigussaasumik assersuutitut aallaavigalugu oqallittitsilluni.

Oqallitsitsinermi aalisarnerup silarsuaaneersut ilaat aggersassavagut. Tassani pineqarput KNAPK, QAK, NTPAP, kiisalu Aalisarnermut Piniarnermullu Naalakkersuisoq, Karl Tobiassen.

Oqallitsitsinermi Soqutigisaqaqatigiit Naalakkersuisullu nungusaataangitsumik atuineq qanoq paasineraat, taamatuttaaq piujuaannartitsinissaq eqqarsaatigalugu aaqqiissutaasinnaasunik suleriusaasinnaasunillu sunik innersuussuteqarsinnaanersut sammineqassallutik.