Issittup Imartaata illersorneqarnissaa pillugu Oceans North Kalaallit Nunaat aamma Inuit Issittormiut Siunnersuisoqatigiiffiat ICC- Kalaallit Nunaat akunnerminni suleqatigiinnissaat.
Nuuk, Kalaallit Nunaat ulloq 6. juuni 2024 – Oceans North Kalaallit Nunaat (ONKN) aamma Inuit Circumpolar Council Kalaallit Nunaat (ICC) pingaaruteqarluinnartumik suleqatigiinnissamut isumaqatigiissuteqarput, ingerlatsinermi inuit peqataanissaannik Issittup Imartaanik illersuinissap siuarsarnissaanik siunertaqarlutik.
Isumaqatigiissutip matuma siunertaraa nunarsuami imaani uumasoqatigiiaaqarfimmik annerpaamik aammalu innarlersimannginnerpaamik, Issittup Imartaanik, attassiinnarnissamut suliniutip patajaallisarnissaa. “Issittumi suliniut” aqqutigalugu ICC-p aamma nunap inoqqaavisa qanimut suleqatigiinnissaannik pilersitsisoqarpoq, uumasoqatigiiaarfiit attanneqarnissaat aamma mianerineqarnissaat siunertaralugu.
6. juuni 2024-mi atsiornikkut ONKN pisussaaffeqalerpoq 2024-mut 1,7 mio. koruuninik tapiissalluni paaseqatigiittumillu isumaqatigiinnerup kingorna ukiunut sisamanut sivitsuinissamut periarfissalimmik. Aningaasat taakkua ICC Kalaallit Nunaata nunani tamalaani peqataasarneranut pitsanngorsaanissamut atorneqassapput, tassunga ilanngullugu ICC-p nunani tamalaani qitiusumik oqalliffianni Inuit peqataanerunissaannut annertusaanermik suliniuteqarnera, soorlu Naalagaaffinni Peqatigiinni nunani tamalaani imarsiornermut kattuffimmi (IMO), aamma Issittup Imartaata Qiterpasissuata nalimmassarneqanngitsumik aalisarnermik pitsaaliuineq pillugu isumaqatigiissut pillugu ”Central Arctic Ocean Fisheries Agreement” (CAOFA) suliami, issittup imartaata qiterpasissuani aalisarnermik illersuinissamik ukkataqartumik. Taassuma saniatigut ICC-p Pikialaarsuarmik ingerlatsinermi Inuit aqutsinerat siuarsarniarlugu suli suliaqarnera qulakkeerniarlugu tapersiisoqarpoq.
Jens Immanuelsen, ONKN-mi siulersuisuni siulittaasoq, oqarpoq:
“ICC Kalaallit Nunaat peqatigalugu taamatut suleqateqalernerput tulluusimaarutigaarput, tamatumalu issittup imartaani illersuinissamut pimoorussinitsinnut takussutissaavoq. Isumaqatigissut una siunissami kinguaariinnut uumassuseqatigiiaat immikkuullarissut attanneqarnissaannut anguniakkatsinnut patajaallisaassaaq”.
Sara Olsvig, Inuit Circumpolar Council-imut nunani tamalaani siulittaasoq aamma Hjalmar Dahl ICC Kalaallit Nunaannut Præsidenti oqarput:
“Nuannaarutigaarput, ICC Kalaallit Nunaat ukiorpaalunni ICC-p nunani tamalaani imartanik aqutsinermi sulineranut peqataasinnaalissammat taamaalilluni Inuit sinnerlugit annertuumik sunniuteqarnissaq qulakkeersinnaallugu. ”
Paasissutissat annertunerusut pillugit attavigineqarsinnaavoq:
- Oceans North Kalaallit Nunaat: Pisortaq Jenseeraq Poulsen, Jenseeraq@oceansnorth.gl, Mobil: +299 483467
- ICC-Greenland: ICC Chair, Sara Olsvig, sara@inuit.org, oq.: +299 323632
Oceans North Kalaallit Nunaat pillugu:
Oceans North Kalaallit Nunaat Issittup imartaani uumasoqatigiiaat illersorneqarnissaat nungunneqaannginnissaallu nunap inoqqaavi allallu soqutigisaqaqatigiit peqatigalugit sulissuteqarpoq.
Inuit Circumpolar Council pillugu:
Inuit Circumpolar Council (ICC) nunani tamalaani nunap inoqqaavisa kattufferaat, Kalaallit Nunaannit, Canadamit, Alaskamit aamma Chutkokamit Inuit sinniisoqarfigisaat. ICC-mit sulissutigineqarpoq inuiaqatigiit Inuit patajaallisarneqarnissaat aamma nuna tamakkerlugu nunat tamalaat nalingalugit pisinnaatitaaffiisa soqutigisaasalu siuarsarneqarnissaat.
