Oceans North Kalaallit Nunaannit (ONKN-ip) Adolf Jensen-ip qanittukkut kivineratigut Nanortaliup imartaata qanittuani immap peqqissusaanut inuiaqatigiinnullu kinguneqapilussinnaanera aarleqqutigaa.
”Qujamasuutigaarput, umiarsuarmiittut tamarmik ajunngimmata, aammalu ajoqusertoqarsimanngimmata,” Jenseeraq Poulsen ONKN-ip pisortaa oqarpoq.
”Imaassinnaasorli suli sumiiffimmi immami avatangiisaanilu mingutsitsisoqarsinnaasoq, inuillu inuussutissarsiutaannik akornusiisoqartoq.”
Umiarsuaq 30 meterinik takissuseqartoq ulloq septembarip 19-anni ikkarlinnermi kingorna kiviartulerpoq. Politiit nalunaaruteqarnerattuut umiarsuaq uuliamik dieselimik 15-20.000 literimik umiarsuarmiittoqarpoq aammalu motoorip uuliassaanik 1.000 literip missaniittumik aamma usilluni. Upalungaarsimanissamik suliaqartut assiaqutinik puttasunik 25 meterisut takitigisumik ammalortunngorlugu umiarsuaq assersimavaat uuliakoortoqassagaluarpat uulia aniasoq siaruattaaliorlugu. Politiit kingorna uppernarsarpaat, umiarsuaq immap naqqanut kivisimasoq uuliamillu aniasoqartoq, kisianni suli ilisimanngilaat, uulia suminngaaneernersoq, imaluunnit qanoq annertutigisumik maqisimanersoq.
Uulia immami uumasunut arlalitsigut ajoqutaasinnaavoq. Soorlu assersuutigalugu timmissat meqqui uuliatiterneqaraangamik meqquisa imermik pitarneqarsinaannginnerat katattarpoq, Taamatut pisoqartillugu meqquisa oqorsaasinnaaneri puttasinnaanerallu akornuserneqartarpoq, tamatumalu kingunerisinnaavaa issimik, ipinikkut imaluunniit kaannermik toqquteqarneranik. Immami miluumasut akornanni nannut aamma arferit soqqallit uuliamik maqisoqarnera peqqutigalugu sunnertianerpaasarput. Nannut amertik eqqiarniarlugu aluttortarpaat taamaasillutillu uuliamik iioraasarlutik. Arferit soqqallit aamma taamaasiortarput soqqatik uuliartaqaleraangata. Aalisakkat aamma toqqaannartumik sunnerneqarsinnaapput masimikkut erlavimmikkullu, imaluunniit toqqaannanngikkaluamik annikinnerusumik alliartornerannut imaluunniit kinguaassiorsinnaanerat ajoquserneqarsinnaalluni. Aalisakkat uumasullu qaleruallit isiinnarmik isigalugit takussutissartaqanngikkaluarlutik uuliakoorfigineqarsimagunik, mamassusaat allanngortarput nerineqarnermikkullu peqqinnissamut akornutaalertarlutik. Uulia immap naqqaniileruni, siunissaq sivisooq isigalugu ukiuni qulikkaani ajortumik sunniuteqarsinnaavoq taamaattumillu aaliangiisuulluinnarpoq sukkasuumik iliuuseqarnissaq sapinngisamillu annertunerpaamik uuliakkoornermik saliinikkut.
”Iluanaarpugut, pisoq taanna allanut naleqqiullugu annertuallaanngimmat,” Poulsen oqarpoq. ”Kisianni kalaallit qanoq annertutigisumik pinngortitamik isumalluuteqarnerat isigissagutsigu, taava sapinngisarput tamaat uuliakoortoqarsinnaanera annikinnerpaaffissaaniitinniartariaqarparput – maannakkut siunissamilu.”
Poulsen-ip uparuarpaa, annertusiartuinnartumik umiarsuarnik kalaallit nunaata imartaani angallattoqarnera ilimanartoq piffissaq apeqqutaaginnalersoq ajornerusumik pisoqarsinnaaneranik. Ukioq kingulleq umiarsuaq nuannaariussuaq Nunatta kangiani Nuna Eqqissisimatitami Alpefjord-imi ikkarlippoq. ”Immaqa piffissanngorpoq atortutigut pisinnaasarput uuliakoortoqarsinnaaneranut upalungaarsimaniarluni nunatta sineriaani annertusaanissarput, aammalu uuliakoornermik assersuisinnaaneq kiveqqasumillu atortunik sioqqanik kinnganernilluunniit milluuasinnaasunik atortorissaarutimik umiarsuaaqqamilluunniit, ROV-inik assingusunilluunniit, ajutoornerup annertussusia millisinniarlugu kiisalu sukkasuumik sunniuteqartumillu iliuuseqarsinnaaneq pilersinniarlugu.” Poulsen naggasiivoq.
Annertunerusumik paasisaqarusukkuit, attaviguuk:
Jenseeraq Poulsen
Oceans North-imi Kalaallit Nunnaani pisortaaneq.
Oqarasuaat +299 483467
