Tusarniaanermi akissut politikikkut naammassisassaannaanngilaq, tusarniaanermi akissut tamat oqartussaaqataaneranni aalajangeeriaatsip ilagaa pingaarutilik.
Politikkip inuiaqatigiillu naapiffianni pissanganartuni ajornakusoortuni Inatsisartut inatsisaannik ilusiliineq Naalakkersuisut kisimik akisussaaffiginngilaat, kisianni ataatsimoorluni akisussaaffiuvoq. Naalakkersuisut tamat, tassunga ilanngullugit innuttaasut, inuussutissarsiortut, ilisimatuut NGO-t, suliffeqarfiit aamma soqutigisaqaqatigiit allat peqataatinniarlugit ilisimasat assigiinngitsut katersorniarlugit inatsisissatut siunnersuut tusarniaassutigineqarpoq. Periuseq taanna inuiaqatigiinnut pitsaanerpaasussamik oqimaaqatigiinnerusumik inatsisiliornissaq anguniarlugu aalajangiisuuvoq.
Kisianni susoqassava, Naalakkersuisut takutippassuk, tusarniaanermi akissut ajoqutaasinnaasutut isigineqarpat iluatinnartutuunngitsorlu?
Aalisarneq pillugu inatsisissap nutaap suliarinerani suleriaaseq unammilligassamut matumunnga takussutissaavoq. Malunnarpoq Naalakkersuisut aalisarneq pillugu inatsisissaq pillugu tamat isumaannik pissarsiniartutut qallikkut isikkoqartut, tassalu inatsisinik peqataatitsiffiusunik eqqarsaatigilluakkanillu pilersitsiniartutut. Aalisarneq pillugu inatsimmut siunnersuut suliarineqarpoq tusarniaanerlu aallartinneqarpoq.
Tusarniaanermilu akissutit qisuariarfigineqarnerminni pasinarsarneqarput, tusarniaanerup siunertaanik salliutitsinngitsumik. Apeqqullu takkuttoq, tassaavoq: Sooruna aalisarneq pillugu inatsisissamut tusarniaanermi akissutit pingaaruteqannginnerusutut aamma Naalakkersuisunut peqatigiiniapilulluni iliuuserineqartutut aalajangersimasutut isigineqartut akerlianik isumassarsiatsialattut eqqarsaatigineqartutut tiguneqaratik?
Aalisarneq pillugu inatsisissatut siunnersuut tusarniaassutigineqalermat tamat annertuumik qisuariaateqarput, tamatumalu takutippaa sammisap pingaaruteqassusaa, Naalakkersuisullu tusarniaanermi akissutinut salliutitsinngippata, immitsinnut aperisariaqarpugut, sooq soqutigisaqaqatigiit isumaat pillugit tusartinneqarusullutik piumasaqarsimanersut.
Inuussutissarsiortut, ilisimasallit aamma inuiaqatigiit ernumassuteqarlutik oqariartuuteqarput, kisianni mianersoqqussutit Naalakkersuisunit tusaajumaneqarpasinngillat. Tusarniaanermut akissutit taakkua isornartorsiuinerinnaanngillat, kisianni aamma inatsimmut attanneqarsinnaasumut siunnersuutaapput pitsaasut – avatangiisit aamma inuiaqatigiit iliviitsuutillugit.
Tusarniaanermi akissutit persuarsiorpalaartumik tunngavilerlugit nassiussaannaanngillat, inatsisip ilusilernissaanut aamma pitsanngorsarnissaannut sakkussaapput. Tusarniaaneq naammassiniaannagassaanngilaq; Inatsimmi kukkunernik pinaveersaartitsinissamut ilisimasanik isiginnittariaatsinullu assigiinngitsunut Naalakkersuisut aqqutissaqarnissaannut qulakkeerisussanngorlugu ilusilerneqarpoq.
Tusarniaanermi akissut Naalakkersuisunut siunnerfilimmik saassussinerunngilaq, kisianni unneqqarittumik saaffiginninneruvoq, nersualaarinninnertalik aamma isumatusaartumik isornartorsiuinertalik.
Naalakkersuisut isummersuutinik taakkuninnga isiginninnginnissaminnut piumasaqaatitaqanngitsumik pisinnaatitaaffeqarput, kisianni apeqqut unaavoq: Tamanna isumatusaarnerua?
Aalisarneq pillugu inatsisissamut tusarniaanermi akissut tamat oqartussaaqataanerannut ilaavoq pingaarutilik, tamat inatsisip ilusilerneranut peqataatitsiviusoq. Naalakkersuisut tusarniaanermi akissutit oqimaaqatigiittumik inatsisip ineriartortinnissaanut ilassutitut nalilittut inuiaqatigiinnut pitsaanerpaajusussatut isigissagaat pingaaruteqarluinnarpoq. Tusarniaanermi akissutit soqutiginnginneri tusarniaanermut siunertamut sanngiillisitsisinnaavoq tamatumalu kingunerisinnaallugu inatsisit amigaateqarneri. Taamaattumik pingaaruteqarpoq Naalakkersuisut tusarniaanermi akissutit pimoorutissagaat aamma aalisarneq pillugu inatsisissap nutaap ilusilerneqarnerani eqqarsaatigissassat.
Paasissutissat annertunerusut pillugit attavigineqarsinnaavoq:
Jenseraq Poulsen – mobil: +299 48 34 67 – Jenseeraq@oceansnorth.gl
