Pikialasorsuaq pillugu anguniagaqarnissamik nalunaarummik Kalaallit Nunaata Canadallu atsioqatigiissutiginninnerannik Oceans North Kalaallit Nunaata pilluaqquai. Imartamik pingaaruteqartumik taassuminnga illersuinissamik aqutsinissamillu naggueqatigiinnit Inunnit aqunneqartussamik atuuttunngortitsinissamut suliap ingerlaqqinnissaa ONKN-ip qilanaaraa.
Naalakkersuisut Canadallu akornanni nalliuttorsiorpaluttumik katerisimaarnermut Reykjavikkimi Kalaallit Aallartitaqarfiat ullumi qitiuvoq. Pikialasorsuaq pillugu ataatsimoorussilluni anguniagaqarnissamik nalunaarummik Kalaallit Nunaanni Nunalerinermut, Imminut Pilersornermut, Nukissiutinut Avatangiisinullu Naalakkersuisoq Kalistat Lund aamma Canadami Aalisarnermut imartanullu Naalakkersuisoq Diane Lebouthillier nalliuttorsiorpalaartumik katerisimaarnermi atsioqatigiipput. Nalliuttorsiorpalaartumik katerisimaarnermut Oceans North Kalaallit Nunaat (ONKN) najuuttunut ilaavoq.
Issittumi imarnersani sikusartumit ungalusanit annertunerpaatut uumassuseqarnermilu annertuumik pinngorarfiusutut Pikialarsorsuaq uumassusilinnut imarmiunut amerlasuunut inuussutissaqartitsiviuvoq, taakkunani uumasut issittumi uumassuseqatigiit ataqatiiginerannut inuiaqatigiillu ataannarsinnaanerannut aalajangiisuullutik inissisimallutik. Uumassuseqarfimmik asseqanngitsumik atatiinnartitsiniarnerup imaani uumassuseqangaassutsimut qaffassaasuussaaq silaannaallu allanngortornerata kingunerata sunniutaanik sanngiillisitsissalluni.
Pikialasorsuarmik aqutsinissamik ataatsimoorussamik tunngavigisassamik ineriartortitsinissamik suliaqartussamik Kalaallit Nunaat Canadalu suleqatigiisitamik pilersitsissasut anguniagaqarnissamik nalunaarutip pingaarnertut imarivaa. Nunat killeqarfigisai akimorlugit qaangerniagassat ataatsimoorunneqarput taamaalilluni Pikialasorsuarmik atuinissamut illersuinissamullu aaqqissutissat ataatsimoorunneqartariaqarlutik. Sumiiffimmi pingaarluinnartup piujartinnissaanut ataatsimoorussilluni anguniagaqarnissamik nalunaarut alloriarneruvoq pingaaruteqartoq.
Imartanik illersuinerup siuarsarnissaa imaanilu pisuussutit uumassusillit piujartitsineq tunngavigalugu atuinissamik siuarsaanissaq ONKN-imi sulissutigaarput. Pikialasorsuup kulturikkut pingaaruteqarluinnartutut avatangiisitigullu annertuumik sunniuteqarnera ONKN-imit paasineqarpoq taamaattumillu suleqatigiinnissamik isumaqatigiissutaasoq qangaaniilli utaqqineqartoq tamakkiisumik tapersersorlugu. Pikialasorsuaq pillugu isumalioqatigiissitap (2016-imiit 2018-imut) suliaanik, suliat Baffinnip Kangerliuimanersuani najugaqartut Inuit Pikialasorsuup siunissaanut takorluugaannik sukumiisumik paasiniaaffiginerannik Anguniagaqarnissamik nalunaarut tunngaveqarpoq.
Naalakkersuisoortutigut pisortatigoortumik akuerineqarneratigut takorluugaq maanna alloriaqqippoq. Killeqarfiit akimorlugit imarnersamik sikusartumit ungalusamik illersugassamik sumiiffimmik toqqagaqarneq aamma alloriarneruvoq pingaaruteqartoq. Naalagaaffiit Peqatigiit Kunming-Montreal Global Biodiversity Framework (Kunming-Montreal pilersaarut) nunat pisussaaffilerpaat nunartami imartamilu 30 procentii angullugit 2030 tikitsinnagu illersussagaat, Pikialasorsuarmik illersuineq anguniakkat taakku anguneqarsinnaanerannut takussutissaavoq pingaaruteqartoq.
”Ilisimatusarnerit takutippaat imartanik sumiiffinni illersuinerit imaani uumasoqangaassutsimik piujuartitsinissamut sunnerneqaruminaatsitsimullu periusaasoq pisariunngitsoq sunniuteqarluartorlu. Piffissami silaannaap allanngoriartornerata sukkatikkiartuinnarfiani aalisarnermut piniakkanullu sunniuteqartumi naggueqatigiit Inuit imartanut pitsaasumik illersuinissamik takorluugaannik illersuisumik Pikialasorsuarmik aqutsisoqarnissaa Oceans North Kalaallit Nunaat isumaqatigilluinnaraa” Jenseeraq Poulsen, ONKN-imi pisortaq oqarpoq.
Maanna anguniagaqarluni nalunaarut atsiorneqarsimalereersillugu aqutsinissamik suleqatigiissitap pilersinneqarnissaanik anguniagassaanillu alloriaqqinnissamut aalajangersaassasut ONKN-ip Naalakkersuisut anguniagassanik piffissalersuinissanillu aalajangersaaqqullugit kaammattorpai. Aqutsinissamut nagguaqatigiit Inunnit ingerlanneqartup qanoq isikkoqarsinnaaneranik aamma Pikialasorsuup qanoq illersorneqarsinnaaneranik periarfissaasut pillugit siunnersuisinnaanermut ONKN suleqatigiinnissamut qilanaarpoq.
Tusagassiorfinniit attaveqarfiginninnissamut sukumiinerusumillu paasissutissanik noqqaanermut saaffigineqarsinnaavoq:
Jenseeraq Poulsen
Pisortaq, Oceans North Kalaallit Nunaat
jenseeraq@oceansnorth.gl
+299 483467
