NUUK—Oceans North Kalaallit Nunaat (ONKN) Norgep ikinnerussuteqarlutik naalakkersuisuisa Norgellu inatsisartuini illuatungiliuttut partiit marluk tunuliaqutseeqatigalugit aalajangigaannut imartaminni immap naqqani itisuumi aatsitassarsiorniarluni ernumassutigivaa. Norgep aatsitassarsiorfissatut piukkussaa Svalbard`ip kujasissuaniit Jan Mayen Kujasissuanut ingerlaarpoq Norgep nunaata toqqaviata naanerata tungaanut allaat ingerlaarluni. ”Taamatut aatsitassarsiorniartut Nunatta imartaata avatinnguani ingerlanneqarniarpoq, tamannalu aalisagaatitsinnut ilungersunartumik kinguneqaratarsinnaavoq, aalisarnerlu Nunatta pinngitsoorsinnaanngilaa, inuiaqatigiinni inuussutissarsiutitta pingaarnersaraat,” taamatut oqarpoq Jenseeraq Poulsen, ONKNp pisortaanera.
Immami itisuumi aatsitassarsiorneq annertusiartortuuvoq ernumanartoq, tunisassiornerullu taassuma assortuussutaasup siunertaraa immap naqqaniit aatsitassanik piiaanissaq. Ilisimatoorpassuit, avatangiisinut suleqatigiiffiit naalagaaffiillu immami itisuumi aatsitassarsiornissamut akerliupput ilungersunartumik kinguneqaratarsinnaanera pissutigalugu, immap iluani avatangiisinut sunniutigisinnaasai suli annertunerusumik ilisimasaqarfigineqanngimmata, immamimi itisuumi nerisaqaqatigiit qanoq aaqqissugaanerat ilisimasaqarfigineqarpianngillat. Norgep sapaatip akunnerani siusinnerusukkut nalunaarpoq, immami itisuumi aatsitassarsiornissamik misissuinissaq nunat immallu issittut avannarlerni ilaatigut aallartinniarlugu.
“Imaq nunat assigiinngitsut killilersuinerat pillugu naalatsinneqarsinnanngilaq,” Poulsen nassuiaavoq. ”Nalunngilarput, immami itisuumi aatsitassarsiorneq sumiiffimmi aalajangersimasumiit suli ungasinnerusumut ilungersunartumik kinguneqariaannaasoq. Aatsitassarsiornermi kinnernit pilersitaasut, allaat immami itisuumi piiaffimmiit ungasissorujussuarmut nooriataarsinnaasut immamilu inuunermut sunniuteqarujussuarsinnaallutik. Norskit ilisimatuuisa qanittukkut tamanut saqqummiummassuk pissusiviusut takutippaat uumasut ilai aalajangersimasut kinnernit pilersitaasumik uippakajaarnermik eqqugaasartut, kingunerisaallu ernumanarluinnarput, tassami immami itisuumi aatsitassarsiorneq nerisareqatigiit aaqqissugaanerinuinnaq sunniuteqarnavianngimmat, inunnummi aamma sunniteqartussaammat immami inuussutissarsiornikkut pingaarnerpaamik inuussuteqartunut.
Ilanngullugu aamma ernumanarpoq Norgemi ilisimatuut suliniutit kingunerisassaattut namminneq misissugaata takutimmassuk, Norgep naalagaaffittut nammineq pitsaassutsimut piumasaqaataannut naammassinninngitsoq. Aatsitassarsiorfissatut siunnersuutigineqartup ilarujussua aammattaaq immikkut ajortialluinnartutut nalilerneqareernikuuvoq soorluttaaq økologiskimik naleqarluinnartutut inissinneqarnikuusoq. Immami tassani annertoqisumi økosystem´it ernumanarluinnartumik inissisimapput, mingutsitsinermik nalaanneqassappata aaqqeqqinngisaannartussatut allaat nalilerneqareernikuugamik.
ONKN suliamik pineqartunik unitsitsigallarnissamik tapersersuivoq; immami itisuumi aatsitassarsiornissaq unitsinneqarallarnissaa siunniullugu, aatsaallu ilisimatusarnikkut suli annertunerusumik paasiniaasoqareerpat økosystem´inut pineqartunut, qanorlu immap naqqani itisuumi aatsitassarsiornermi pisoqarsinnaanera paasineqarluareerpat, sumiiffinni aamma nunarsuarmi ammaassisoqaqqissasoq. ”Immami pisuussutitta uummassusillit asuli piulluanngitsuliorfigineqarput, naak pisuussutivut pingaaruteqangaartut nerisassatut aamma inunnut inuuniutissatut. Tunngaviusumik tamanna kukkunerulluinnarpoq immami itisuumi aatsitassarsiorluni piiaasoqalissappat, naak kingunerisassai suli minnerpaamilluunniit ilisimaneqanngitsulluunniit, aamma eqqarsaatigisariaqartut ilagilluinnarpaat, Europa-Parlament´i nunat EU-mut ilaasortaasut kajumissaareermagit immami itisuumi aatsitassarsiornissamik nunarsuarmi unitsitsigallarneq tapersersoqqullugu”, ”Aningaasaqarnikkut piujuaannartussamik atoqqiissarnikkullu imminut napatissinnaasumik aningaasaqarniarnissarput paaralugulu inerisartariaqarparput.” Poulsen oqarpoq.
Annertunerusumik paasisaqarusukkuit attavissaq:
Jenseeraq Poulsen
Mobil: +299 48 34 67
E-mail: jenseeraq@oceansnorth.gl
